Скопска Црна Гора

Скопска Црна Гора — средно-висока планина во северниот дел на Македонија. Се издига помеѓу Скопската Котлина на југ, Кумановската Котлина на исток, Гниланската на север (во Косово) и долината на река Лепенец на запад. Планината се протега во правец ЈЗ-СИ, со највисок врв Рамно (1.651 м). Со долината на Липковска Река поделена е на два дела: западен повисок и источен понизок, познат под името Карадак. На Скопска Црна Гора се наоѓаат изворишта на поголем број речни текови. Целиот крај околу планината понекогаш се вика Црногорија и е многу богат со цркви и манастири.

Историја

Не е познат периодот од кога оваа област се нарекува со своето денешно име или назив со кој се именува, меѓутоа се смета дека за првпат била спомената во XIII век кога бугарскиот цар Константин Асен ги оставил селата во својата задужбина, потоа Црна Гора повторно се споменува во 1300 г., во повелбата на кралот Милутин во црквата Свети Ѓорѓи во Скопје. Во XV век Црна Гора е спомената во житието на деспотот Стефан Константин Филозоф. Турците по освојувањето на Скопје го превеле името од Црна Гора во името во Кара-Даг, и овој израз сè уште може да се најде во употреба до ден денес.

извор: Wikipedia